Eth Ministèri de Foment a hèt pùblic eth projècte de milhora dera N-230 ena Val d’Aran. Era administracion defense eth bastiment d’ua naua N-230 a compdar dera Boca Nòrd deth Tunèl de Vielha enquia Aubèrt, damb un recorregut de lèu 12 kms. Aguesta naua via, qu’aurie trams de tres carrils, anarie peth cant dera Tuca enquia arribar a Betren, entà contunhar per Vilac e fin finau arribar en Aubèrt a on enlaçarie damb er actuau traçat dera N-230. En tot aguest tram, i aurie un tunèl, un semitunèl tà esvitar es lauegi e 13 viaductes.Eth pressupòst d’aguesta òbra serie de 84 milions d’èuros. Des dera Val d’Aran an gessut veus critiques coma es deth Conselh Generau d’Aran o er ajuntament de Vielha e Mijaran. Eth baile municipau, Juan Antonio Serrano, a refusat aguesta melhora, e ac someterà ara opinion des bailes pedanis afectadi, entà que poguen presentar allegacions ara prepausa.

Foment contemplaue un totau de 4 prepauses de melhora. Es autes que sigueren refusades comportauen eth pas dera N-230 ath cant de Casau e Gausac. Un aute des factors qu’an comportat eth refús ara prepausa, ei era implementacion dera circulacion de camions que supausarie aguesta milhora.

Ara, des dera Val d’Aran an lèu un mes entà presentar es allegacions avientes a Foment, abantes eth ministèri espanhòu non prengue era decision finau entà amiar endeuant un projècte que contunhe sense compdar damb eth vist-e-platz deth territòri.