Era Val d’Aran a reaccionat deuant dera senténcia deth Tribunau Constitucionau qu’a suspenut era preferéncia der aranés coma s’establie ena Lei 35/2010 der occitan. Ua consideracion qu’obligaue ath sòn emplec preferent enes administracions publiques, estataus e autonomiques entà autrejar-li ua proteccion lingüistica respecte as autes lengües cooficiaus en Aran, eth castelhan e eth catalan.

Ath delà des partits polítics deth Conselh Generau d’Aran, que s’an opausat ad aguesta senténcia, cau descatar ar Institut d’Estudis Aranesi-Acadèmia Aranesa dera Lengua Occitana, que se planh per aguesta decision, pr’amor que consideren que sense aguesta proteccion, er aranés pòt desaparéisher.

Er aranés enquiara ei era lengua abituau de comunicacion enes administracions publiques, atau coma enes estudis e en bona part des mieis de comunicacion. Se ben en carrèr mens deth 20% l’emplegue coma lengua abituau. Senténcies com aguestes, an fomentat un planh generalizat en territòri.