Er Ajuntament de Vielha e Mijaran ja a daurit, un an mès, era piscina exteriora deth Palai de Gèu, entà qu'es vesins e vesies poguen gaudir d'aguesta installacion municipau pendent tot er ostiu. Enguan aguesta piscina demorarà dubèrta enquiath pròplèu 1 de seteme.

En tot profitar era arribada deth bon temps, er Ajuntament a volut encetar era sason d'ostiu uns dies abans der inici oficiau d'aguesta sason der an. D'aguesta manèra, toti aqueri que volguen, ja pòden gaudir d'aguest equipament. Es prètzi seràn es madeishi qu'en ans anteriors. Era mainadèra enquias 7 ans an era entrada de franc, de 8 a 16 ans paguen 2€ e entàs màgers de 16 ans era entrada a un valor de 3€. Er orari de dubertura ei d'11:00 a 19:00. Ena madeisha installacion i aurà servici de bar permanent pendent er orari de piscina.

Segontes eth còsso d'Espòrts e Joenessa, Alberto López, “èm satisfèti de poder daurir, un an mès, era piscina exteriora deth Palai de Gèu, en tot aufrir un servici que fòrça gent gaudís ath long der ostiu. Demoram qu'era sason sigue profitosa e damb bona climatologia entà toti, e pogam tornar a auer ua nauta preséncia d'usatgèrs”.

HÒNT: AJUNTAMENT DE VIELHA E MIJARAN