Atau madeish, s’actuarà en diuèrsi espacis publics entà poder milhorar-ne er aspècte generau e cambiar es materiaus d’acabat per uns que requerissen mens manteniment. D’aute biais, calerà dessenhar un traçat nau entàs carrèrs entà poder minimizar er impacte que genèren es veïculs mès grani enes façades des bastisses.

Ath hons deth carrèr Clòses se realizarà era milhora dera zòna de parcatge damb era formacion d’ua petita plaça damb bòrd e gual de granit, pavimentada damb empèires de mortèr de color nere.

Era licitacion compde damb un pressupòst de 38.416,62 €, e s’executarà en un tèrme de 2 mesi e miei en 2025. Es empreses interessades pòden presentar es sues aufèrtes ena sedença electronica der Ajuntament de Vielha e Mijaran enquiath pròplèu 3 de deseme.


Aguesta actuacion hè part deth plan d’urbanizacion e adeqüacion qu’eth consistòri inicièc en 2022 enes que s’includien milhores ena Avenguda Castièro, era Avenguda dera Tuca, es carrèrs Clòses, Quate Lòcs, Pomaròla, Anglada e camin de Casau.

“Damb aguest projècte d’urbanizacion e adeqüacion des trepadèrs e paviment des carrèrs Clòses e Montanero, seguim damb era melhora d’aguesti espacis publics, en tot favorir ua melhora accessibilitat e circulacion entàs pedons”, comente eth baile de Vielha e Mijaran, Juan Antonio Serrano. E ahig que “er ambiciós projècte que inicièrem en 2022 a supausat ua milhora considerabla dera imatge e foncionalitat de diuèrsi carrèrs de Vielha des d’alavetz, e seguim damb era sua execucion entà qu’aguesta milhora sigue mès efectiua”.


HÒNT: AJUNTAMENT VIELHA E MIJARAN