Laguens dera estrategia de prevencion d'agressions sexistes enes contèxtes d'òci e hèstes, er Ajuntament de Vielha e Mijaran installarà per prumèr viatge un punt lila, que serà plaçat ena entrada dera Sala Polivalenta pendent era sua Hèsta Major. Ua iniciatiua que neishec a finaus deth 2018, quan se bastic eth plan d'igualtat en Ajuntament.

Jos eth lèma "Non ei Non", er objectiu deth punt lila o punt segur ei previer tota sòrta de mautractament, ja sigue fisic coma verbau. Un espaci de denóncia e seguretat daurit a totes e a toti.  

En aguest marc, eth consistòri ja hè dies qu’a començat ua campanha digitau especiau que s'alongarà enquias dies dera Hèsta Major.

Darrèr d’aguest punt lila se traparàn professionaus formadi e sensibilizadi ena matèria que proporcionaràn materiaus informatius e de prevencion de forma totauments confidenciau.

Concrètaments, eth punt lila s'activarà pendent es nets deth 7, 8, 9 e 10 de seteme, en tot coïncidir damb es activitats nocturnes programades tara Hèsta Major de Vielha.