Er Ajuntament de Naut Aran denóncie auer patit un atac cibernetic ena plana web

22/11/2022

Er Ajuntament de Naut Aran vò comunicar qu'ager ath meddia patic un atac cibernetic en quau, un bòt (un programa intelligent informatic), accedic en airau dera seccion de notícies en version aranesa e introdusic ua sèria de tèxtes en idiòma rus e anglés.


Non s’a pogut panar cap tipe de donada, pr’amor qu'aguesta web non conten informacion sensibla de forma privada perqué sonque aufrís contenguts que se publiquen entà toti es usatgèrs que navèguen ena part publica dera web. 


En aguest sens, un viatge detectada era incidéncia, era equipa tecnica d’informatica der Ajuntament de Naut Aran a erradicat eth problèma çò de mès lèu possible entà seguir damb eth foncionament ordinari dera web deth pròpri consistòri.


HÒNT: AJUNTAMENT DE NAUT ARAN 
Manu Moga