Arribe era 45au edicion dera Marxa Beret, organizada peth Conselh Generau d’Aran e era estacion d’esquí Baqueira Beret, qu’aurà lòc era dimenjada deth 1 ath 2 de hereuèr de 2024.

Dejà son dubèrtes oficiaument es inscripcions a trauès dera plana web dera Marxa Beret e es interessats e interessades poiràn realizar-les enquia darreries de gèr telematicament. Ath delà, es darrèri dies se poiràn realizar es inscripcions presenciaus.

Era Marxa Beret ei ua des pròves d’esquí nordic mès assolidades que se realizen en territòri nacionau e que cada an compde damb ath torn de mès de 800 participaires de tota Euròpa. En aguest sens cau rebrembar qu’en diuèrses escadences a format part deth Campionat d’Euròpa laguens deth circuit EuroLoppet, un des mès prestigiosi d’aguesta disciplina.

Aguesta hèsta der esquí de hons començarà en Beret eth dissabte 1 d’hereuèr damb er Sprint, que serà coma ei d’abituda eth Campionat d’Espanha laguens deth calendari FIS.

Eth dia 2 d’hereuèr se realizarà era 45au edicion dera Marxa Beret enes distàncies de 42, 21 e 10 kilomètres. Aguesta competicion formarà part dera Copa España de longa distància.