Era incidéncia dera Covid-19 ena Val d’Aran contunhe en tot èster era mès nauta de tota Catalonha. Concretaments, eth territòri compde damb un risc de rebròt que dejà depasse es 2.000 punts. 

Ath delà, era pression es Espitau Val d’Aran non artenh baishar: enes darrères 24 ores s’a amiat a tèrme un traslat ar Espitau Arnau de Vilanova de Lleida. e actuaument, i a 11 persones ingressades. Se regrète tanben era mòrt d’ua persona de 92 ans ena planta Covid. 

En aguest contèxt, eth govèrn aranés a sollicitat ath Departament de Salut dera Generalitat de Catalonha aumentar eth nombre de dòsis de vacunes contra era Covid-19 en país. 

Ua decision qu’a generat era trucada de mans per part deth collectiu sanitari der Espitau aranés.

Cau arrebrembar qu’aguesta setmana s'a iniciat en Aran era campanha de vacunacion as grani depenenti majors de 80 ans e se contunhe damb era vacunacion ath professorat.