Eth Dr. Jesús M. Prujà, Cap deth Burèu d'Accès ara Universitat dera Generalitat de Catalonha, aufric era passada setmana ua conferéncia informativa sus es PAU as alumnes de bachillerat e cicles formatius der Institut d’Aran.

Enguan, dempús deth convèni signat entre, eth Conselh Generau d’Aran, era Generalitat e era Universitat de Lhèida (UdL), enes Pròves d'Accès ara Universitat de 2019 as qué se presenten ath torn de 30 estudiants d’Aran, s'includirà era opcion der aranés enes enonciats der examen d'Istòria, matèria obligatòria entà tot er alumnat.

Damb era preséncia der aranés enes PAU se fomente er emplec, era difusion e era coneishença d’aguesta lengua.

Era oficialitat der aranés garantís qu’es estudiants poguen respóner quinsevolh examen en aranés, exceptat es de lengües.

Era Universitat de Lhèida serà era encargada de provedir es mecanismes necessaris en cas de que siguesse de besonh era traduccion des responses as examens. En successives convocatòries, era Comission de Seguiment designada poderà ampliar es matèries en qué s'establisque era opcion des enonciats en aranés.

Es Pròves d'Accès ara Universitat (PAU) deth 2019 se realizaràn es pròplèus 12, 13 e 14 de junh ena convocatòria ordinària, e eth dia 26 deth madeish mes se coneisheràn es resultats.

Ena convocatòria extraordinària, es examens auràn lòc eth 3, 4 e 5 de seteme e es resultats se haràn publics eth 17 de seteme.

Ei important entar aranés èster present en aguestes pròves e serie positiu qu’es alumnes d’Aran s’impliquèssen ena normalizacion dera lengua pròpia deth país, ben escuelhent er enonciat en aranés o ben responent as pròves que volguen.

Hònt: CONSELH GENERAU D'ARAN