Entusiasme e alegria ei çò que se respire en pòble de Bagergue dempús d’arrecéber eth distintiu que lo arreconeish coma un des pòbles mès polidi d’Espanha. Ua lista creada en an 2011 e que sonque accorròpe 79 pòbles de tot er Estat.

Ath delà, Bagergue se convertís en prumèr membre catalan en entrar ena associacion d’Es Pòbles Mès Polidi d’Espanha. Un prèmi que non aurie estat possible sense er esfòrç dera ueitantea de vesins que i abite en Bagergue.

Sonque pòden formar part d’aguesta selecta lista municipis de mens de 15.000 abitants qu’agen bèth element patrimoniau o naturau catalogat. En cas de Bagergue, era glèisa romanica de Sant Fèlix.

Ena hèira Fitur, celebrada a finaus de gèr, es autoritats competents heren entrega ath pòble de Bagergue dera apertienta acreditacion.

Era repercussion de que Bagergue sigue considerat de forma oficiau, un des municipis mès polidi der Estat, dejà s’a deishat veir enes carrèrs e comèrci.

Entà celebrar aguest hèt, en Bagergue dejà s’està organizant, de cara ar ostiu,  un acte a on i assistiràn diuèrses autoritats.

Ath delà, cau arrebrembar que Bagergue tanben forme part deth projècte "Viles Florides de Catalonha", e qu'enguan arrecebec 4 Flors d'Aunor, eth maxim guerdon autrejat jamès peth concors.