ACTUALITAT
Arties e Garòs receben era sua acreditacion coma “Pueblos más Bonitos de España”
19/01/2023
En marc dera celebracion dera Hèira Internacionau de Torisme de Madrid (FITUR), es conselhèrs de Torisme e Promocion Economica, Juan Antonio Serrano e Josep Canut, e es presidentes des EMD de Garòs e Arties, Mª Àngels Ordax e Lina Fanlo, an assistit aguest maitin tar acte de presentacion oficiau des pòbles que s'an higut enguan ara associacion “Los Pueblos más Bonitos de España”, entre es que se trapen es dus pòbles aranesi
En marc dera celebracion dera Hèira Internacionau de Torisme de Madrid (FITUR), era associacion “Los pueblos más bonitos de España” a celebrat aué er acte oficiau de presentacion des pòbles qu’en 2023 s’an incorporat ar hilat, entre eri Arties e Garòs.
Ad aguest acte an assistit es conselhèrs de Torisme e Promocion Economica, Juan Antonio Serrano e Josep Canut, e es presidentes des EMDs de Garòs e Arties, Mª Àngels Ordax e Lina Fanlo.
“Deth govèrn d’Aran ençà èm plan satisfets de qu’Arties e Garòs s’agen podut híger ad aguest hilat, qu’èm segurs que supausarà un impacte fòrça positiu entà andús pòbles dera madeisha manera qu’ac a supausat entà Bagergue” manifestaue eth conselhèr Josep Canut.
Cau rebrembar qu’eth mes de hereuèr de 2022, era sindica d’Aran, Maria Vergés, e eth conselhèr Canut, mantengueren ua amassada damb eth president dera associacion de “Los Pueblos más Bonitos de España”, Francisco Mestre, en tot mostrar er interès deth govèrn deth Conselh Generau d’Aran de trabalhar entà veir se d’auti pòbles dera Val d’Aran podien arténher tanben aguesta certificacion.
Peth sòn costat, eth conselhèr Serrano afirmaue que: “higer-se ad aguest projècte va en linha damb eth nau plantejament de sostenibilitat toristica que deth Conselh Generau ençà prebotjam, pr’amor que mos ajude a méter en valor er auviatge, cultura e istòria des nòsti pòbles e a diversificar es punts d’interès”.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga