Aran artenh finançament europèu entà consolidar eth sòn modèl sanitari e sociau d’Atencion Centrada ena Persona

15/03/2023

A trauès d’Aran Salut, eth Conselh Generau d’Aran a artenhut dus ajuts europèus finançadi pes departaments de Salut e Drets Sociaus dera Generalitat entà desvolopar eth modèl d’Atencion Centrada ena Persona d’Aran

Aguest maitin a auut lòc era presentacion des auanci en modèl d’Atencion Centrada ena Persona desvolopat peth Conselh Generau d’Aran a trauès deth Servici Aranés de Benèster e Salut (SABS) e Aran Salut e qu’a artenhut finançament europèu a trauès des departaments de Salut e Drets Sociaus dera Generalitat de Catalunya que permeteran qu’es trabalhs progrèssen de manèra mès agila e rapida. Atau madeish, aguest trabalh compde damb eth supòrt d’equips expèrts, d’entre es que ne destaquen era Fundació Unió Catalana d’Hospitals, era Universitat Politècnica de Catalunya (UPC) e era Fundació Tic Salut i Social.


Pendent er acte, qu’a compdat damb era preséncia e participacion dera sindica d’Aran, Maria Vergés, era directora generau d’Autonomia Personau e Discapacitat, Marta Segura, era directora generau de Planificacion e Recèrca, Aina Plaza, eth director-generent d’Aran Salut, Jordi Vilana, e era directora deth SABS, Maria Àngels Borràs, entre d’auti, s’a presentat as representants des departaments de Salut e Drets Sociaus quini trabalhs s’amien a tèrme deth nòste departament de Salut e Benèster, en tot incidir ena importància de qu’eth modèl sanitari e sociau d’Aran se gerís de forma unica e integrada, çò que permet balhar ua respòsta unitària as usatgèrs.


“Eth sistèma sanitari e sociau d’Aran ei un sistèma unic en tot Catalunya que permet balhar ua respòsta unitària deuant des besonhs des persones. Entath govèrn deth Conselh Generau d’Aran ei primordiau reforçar eth nòste sistèma integrat de benèster e salut, un sistèma que place en centre des accions e politiques as persones” afirmaue era sindica d’Aran, en tot híger que: “es hons percebudi ajudaràn a accelerar era consolidacion deth projècte d’Atencion Centrada ena Persona, qu’a coma objectiu ua melhora dera autonomia e qualitat de vida des persones granes, damb discapacitat, malaltia mentau e, en generau, damb besonhs complèxi”.


En aguest sens, eth director-gerent d’Aran Salut manifestaue que: “era descentralizacion territoriau, funcionau e d’autonomia organizativa ena atencion as persones dera que dispause era Val d’Aran, mos balhe oportunitats diferenciaus e uniques entara innovacion, pr’amor que compdam damb ues condicions que mos placen coma entorn ideau entath desvolopament de projèctes pionèrs d’integracion sociau e sanitària, que poguen èster adaptables e extrapolables a d’auti territòris”.

A trauès d’aguest modèl d’Atencion Centrada ena Persona, s’impulsarà era atencion domiciliària per miei de solucions tecnologiques (domotica, robotica e telemedicina), s’incorporarà era gestion de donades as procèssi d’atencion a trauès d’un sistèma intelligent orientat a analizar e preveir es besonhs dera ciutadania, s’impulsaràn melhores ena gestion de casi e se balharàn solucions de supòrt (caminadors, adaptadors, grues...) que faciliten e fomenten er empoderament e vida independent des persones entà que poguen demorar enes sòns larèrs pendent mès temps.


HÒNT: CONSELH GENERAU D'ARAN 
Manu Moga