Era Val d’Aran a tornat a víuer un an mès era jornada commemoratiua deth 8 de març. De bon maitin, es condicions meteorologiques non èren es mès a vientes entà amiar a tèrme cap tipe de celebracion, totun, a meddia eth solei a gessut e a permetut qu’es lectures de manifèst en diuèrses institucions coma era der Ajuntament de Naut Aran o era deth Conselh Generau d’Aran se poguessen hèr sense problèma.

Entre çò que se destaque d’aguesti escrits ei er hèt qu’Aran non ei un territòri immune ad aguestes qüestions e que cau trabalhar en politiques d’igualtat entà potenciar as hemnes e que non se genere cap tipe de desigualtat entre eres e es òmes perqué desvolopen eth trabalh jos es madeishes condicions.

En cas de Naut Aran, pendent aguesta jornada commemoratiua s’a organizat un condacondes entàs mès petiti. Deman s’estrearà un nau sistèma audiovisuau damb eth documentau de Joana Biarnés e mès endauant i aurà un club de lectura ena Bibliotèca de Naut Aran sus un assag feminista, ua sòrta d’accions que cèrquen prebotjar ua societat igualitària.