400 persones participen ena manifestacion SOS Economia Val d'Aran

26/11/2020

Hège dies que s’auie convocat e s’a complit damb era cridada: ues 400 persones an aumplit era plaça dera glèisa de Vielha en ua concentracion entà reivindicar ajudes ath sector des servicis dera Val d’Aran.

Organizada peth Grèmi d’Ostalaria d’Aran, era manifestacion a reclamat as administracions, entre d’autes causes, eth dret a trabalhar e ajudes dirèctes e efectives tà compensar eth barrament des negòcis. 

Era realitat dera Val d’Aran, diden des deth sector dera Ostalaria, non s’a auut en compde ena confeccion dera desescalada. 

David Serrano, coproprietari der establiment de bières artesanes Refu, ei un des centenats d’empresaris d’Aran que refusen es decisions politiques prenudes. 

Pendent era concentracion s’an liejut es demanes que se hèn ara administracion, e dempús s’a amiat a tèrme ua petita marcha per Vielha. 

Laura Rodríguez