2au agent de Miei Ambient detengut pera mòrt der os Cachou

10/06/2021

Era jutgessa de Vielha a ordenat era deteccion e incautacion deth mobil d'un dusau agent encuedat dera vigilància der animau

Dempús de 15 mesi d'investigacion detalhada, lèu miei centenat de declaracions (entre eres, es de cinc persones en condicion d'investigadi), un somari que de forma provisionau supère ja es mil huelhes, e ua investigacion parallela que descaperèc un important cas de trafic de drògues, era jutgessa encargada deth cas ordenèc eth dimars 8 de junh era "Immediata detencion", "damb incautacion deth sòn telefòn mobil e quinsevolh aute aparelh que pogue amiar damb eth", de Carlos Adalid Berart, pera sua presomptiva implicacion ena mòrt deth coneishut os reintrodusit en Pirenèu.


Era detencion, que s'amièc a tèrme ena tarde deth madeish dimars dia 8, non ei ua accion judiciau de mendre importància, sustot pr'amor qu'er implicat ei agent de Miei ambient, còs depenent deth Conselh Generau d'Aran.


Era jutgessa de Vielha base era naua orde de detencion e consideracion d'investigat enes multiples contradiccions exposades enes declaracions enquiara realizades sonque coma testimòni per Carlos Adalid Berart.

Pendent era instruccion d'aguesta causa, que seguís daurida, a demorat en evidéncia qu'eth nau detengut auie accès a informacion reservada sus era localizacion der os Cachou e que, maugrat èster agent de Miei ambient, hège part -damb eth sòn telefòn particular- deth grop de WhatsApp "Plataforma Antiosos", des d'era que se compartiren diuèrsi messatges restacadi damb era mòrt violenta de Cachou.


HÒNT: LA VANGUARDIA
Manu Moga