ACTUALITAT
24au edicion des colònies d’ostieu contra eth Càncer en Naut Aran
16/07/2024
Eth municipi de Naut Aran acuelh deth 14 ath 21 de junhsèga es colònies d’ostieu dera Associacion contra eth Cancer a on 88 joeni d’entre 6 a 17 ans gaudissen d’ua setmana plea d’activitats en nòste parçan autant coma en d’auti emplaçaments dera Val d’Aran damb eth prètzhèt que poguen conéisher e compartir experiéncies damb d’auti mainatges e mainades qu’agen patit ua situacion similara ara sua
Eth consistòri cedís ara associacion equipaments publics de forma gratuïta coma per exemple era Sala Polivalenta de Salardú o era piscina entà qu’era mainadèra pogue divertir-se en tot descorbir naui entorns des que provien. En aguest sens, es 88 joeni s’apròpen a Naut Aran de zònes coma Andalusia, Astúries, Castelha-Leon, Comunitat de Madrid, Aragon o regions de Catalonha coma Lhèida, Tarragona o Barcelona.
66 mainatges e mainades demoren ena Aubèrja de Salardú a on son repartidi en tres grops (petiti, mejana edat e mès grani) a on desvolopen activitats tant diuèrses coma per exemple ua caminada per un des emplaçaments mès toristics de Naut Aran, eth Camin dera Bruisha, era pròpria piscina, o activitats esportiues e ludiques ena Sala Polivalenta.
Era tinent d’alcalde der Ajuntament de Naut Aran, Anna Geli afirme que “ei plan important tàs mainatges e mainades, e tàs sues familhes, que poguen gaudir d’un espaci e d’un entorn que d’abituda non lo pòden gaudir. Era implicacion dera Associacion, des sanitaris e der Espitau e des monitors son puntaus entà hèr ua societat mès amabla e inclusiva”.
Era tinent d’alcalde der Ajuntament de Naut Aran, Anna Geli afirme que “ei plan important tàs mainatges e mainades, e tàs sues familhes, que poguen gaudir d’un espaci e d’un entorn que d’abituda non lo pòden gaudir. Era implicacion dera Associacion, des sanitaris e der Espitau e des monitors son puntaus entà hèr ua societat mès amabla e inclusiva”.
Ath delà, ahig que “tà nosati ei tot un plaser poder acuélher un an mès aguestes colònies d’ostieu dera Associacion contra eth Cancer en casa nòsta e des deth consistòri les cedim diuèrsi equipaments tà que poguen desvolopar diuèrses activitats. Volem qu’eth nòste compromís creishe enes pròplèu ans ath delà dera aportacion que hèm annauments e un exemple n’ei que part des entrades que se recuelhen pendent aguesti dies ena piscina de Salardú, d’entrada generau, anaràn destinades integraments ara associacion”.
Aguestes colònies se desvolopen en Naut Aran de hè 26 ans, totun, pendent era crisi sanitària deth coronavirus s’aueren de suspéner temporaument pendent dus ans.
HÒNT: AJUNTAMENT NAUT ARAN
HÒNT: AJUNTAMENT NAUT ARAN
Manu Moga