Ua vintea de membres deth Comitat Olimpic Espanhòu (COE) a visitat era Val d’Aran.

Pendent aguesta jornada se visitèc as joeni deth Centre de Tecnificacion dera Val d’Aran en Baqueira-Beret, eth Musèu dera Nhèu en Unha e se premanic ua recepcion oficiau ena sedença deth Conselh, a on eth Sindic arregraïc es reconeishements arrecebuts per part deth COE en relacion damb eth gran trebalh que se realize en çò que tanh as espòrts d’iuèrn, e aprofitèc tanben entà demanar que s’age molt en compde era Val d’Aran entath projècte dera candidatura olimpica Barcelona Pirenèus 2026.

Pera sua part, eth president de Baqueira Beret, Aureli Bisbe, destaquèc era implicacion dera estacion damb er esquí de competicion, atau coma damb es sèt clubs aranesi e eth Centre de Tecnificacion, e aprofitèc entà demanar a toti es presents impulsar projèctes conjunts en aguest ambit.

Eth President deth Comitat hèc entrega de dus reconeishements olimpics pendent aguesta recepcion, un ath Sindic d’Aran e un aute ath President dera Federacion Espanhòla d’Espòrts d’Iuèrn (RFEDI), er aranés May Peus.

Ua visita fòrça important entà un territòri coma eth nòste, a on se formen centenats de joeni, non sonque aranesi, senon de tot er estat, entà convertir-se en granes promeses des espòrts de nhèu e gèu e, perque non, grani esportistes olimpics.