Actualitat
Eth Conselh Generau d’Aran aquerís naua maquinaria entàs trabalhs de mantenement des camins e pistes forestaus
10/10/2023
Damb aguest aquesiment se poderà renauir es equips de trabalh qu’emplegue era brigada deth Conselh Generau d’Aran (SAVA) pendent es sasons de primauera e tardor entara neteja e manteniment de camins vesiaus, pistes forestaus e accèssi as pòbles
Eth Conselh Generau d’Aran a aquerit un conjunt de naues maquines entara realizacion des trabalhs de neteja e manteniment des camins e pistes forestaus, atau coma es accèssi entre pòbles e rotes toristiques o camins vesiaus.
En conjunt, s’an aquerit un tractor, un braç desbrossader, ua plataforma de remorcatge, ua picadora trituradora e ua mini excavadora compacta.
Aguesta naua maquinaria servirà entà renauir es equips de trabalh qu’emplegue era brigada deth Conselh Generau d’Aran (SAVA) pendent era primauera e era tardor.
Er aquesiment d’aguest materiau entath mantenement de camins der hilat vesiau e rurau dera Val d’Aran a estat possible gràcies ar ajut artenhut per part dera Direccion Generau de Politiques de Montanha e deth Litorau deth Departament de Territòri dera Generalitat de Catalunya.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga