Un an mès, eth pòble de Canejan dejà a celebrat era sua hèsta mès tipica: es Barbacans.

Era tarde de dissabte, 9 de març, tàs 7 dera tarde toti es participaires comencèren a amassar-se ena Plaça deth pòble entà vestir-se damb es pèths e es còrnes tipiques d’aquesta celebracion.

Ath torn des 8 s’amortèren es lums deth pòble e dèc començament era desfilada des barbacans pes carrèrs de Canejan, illuminadi pes halhes e acompanhats en tot moment pes tamboraires.

Dempús de tornar ena plaça, se procedic ara crema deth pipòt de Magràs e as dances tradicionaus damb es Corbilhuèrs de Les. Ara seguida, er Ajuntament aufric un aperitiu abantes deth sopar popular e era hèsta que seguic.

Era des Barbacans ei ua hèsta tradicionau aranesa que se perdec pendent es ans dera Guèrra Civiu, e non siguec enquia 2004 que se recuperèc, enguan hè 15 ans. Des d’alavetz, tostemp a agut ua bona participacion, damb preséncia non sonque des vesins e vesies de Canejan e d’auti pòbles dera Val d’Aran, senon tanben de visitants que vòlen gaudir des tradicions tipiques deth territòri.

Aguesta ei ua hèsta tostemp a estat plia de simbolismes coma era hemna embarassada que lançaue cendra o era persona que portaue un baston plen de sueja e mascaraue ara gent.

Es vesins se senten plan capinauti d’aguesta celebracion, qu’antigaments mercaue eth desvelhar dera primauera e deth bestiar e que dejà s’a convertit en ua celebracion fixa e demorada en calendari.