Ena darrèra comission d'Urbanisme dera Val d'Aran s'a informat deth Plan director urbanistic de campings en qué se trabalhe. Un Plan qu'abaste tota Catalonha e que perseguís regular aguest sector.

En aguest sens, eth Plan Director ajudarà as campings preexistents a adaptar-se as besonhs legaus en vigor en matèria idraulica, urbanistica e de seguretat.

En referéncia as campings de naua planta, aguest Plan Director establirà critèris d'ubicacion en foncion a factors païsatgistics, de servicis, de mobilitat e de relacion damb nuclèus urbans.

Totun, mentre s'auance en aguest Plan Director, s'i an suspenut licéncies.

Aguesta Comission d'Urbanisme, a estat era prumèra en qu’es expedients an estat geridi dirèctaments pes servicis tecnics deth Conselh Generau, en coordinacion damb era direccion generau d'urbanisme.

Aguest nau format arrespon ath desvolopament dera Lei deth regim especiau d’Aran que fixe eth nau foncionament dera Comission d'Urbanisme d’Aran.

Ath delà, era Comission a aprovat era modificacion des Nòrmes subsidiàries e complementàries de planejament dera Val d'Aran en contorn de Bossòst, entara admission d'activitat de camping en solèr non urbanizable o de proteccion especiau.
Tanplan, s’a aprovat era modificacion des Nòrmes subsidiàries de planejament ena plaça Conselh Generau de Les en çò que tanh ara alineacion de dues edificacions preexistentes respecte ara vialitat.