Er Institut d'Estudis Aranesi presente es 4 naues publicacions elaborades en 2017

20/01/2018

I a 2 vocabularis e dues òbres literàries dera naua colleccion "Modèls de Lengua"

Er Institut d’Estudis Aranesi-Acadèmia Aranesa dera Lengua Occitana, compde damb 4 naues publicacions amiades a tèrme ath long de 2017. Un parelh de libres de vocabulari: Un basic der aranés damb mès de 2500 entrades e un milèr de toponims internacionaus e un 2au dera tecnologia dera informacion. En aguesti libres i a participat ua vintia de persones.

Ath delà, s’an presentat dues òbres literàries: “Sang Nòble e Sang deth Pòble” de Mossen Jusèp Condò Sambeat e “Eth mercadèr de Venècia” de William Shakespeare. Aguestes òbres hèn part d’ua naua coleccion titolada Modèls de Lengua que non an ua periodicitat esblida, mès que des dera Acadèmia demoren que pogue èster un ahèr qu’age ua bona acceptacion.

Enguan, era Acadèmia se trape en tot trebalhar en diuèrsi projèctes. Per un costat, era elaboracion des vèrbs en aranés, que poderie èster prèst en un parelh de mesi. Ath delà, se trebalhe ena fonetica basica der aranés, un diccionari d’ortografia damb 25000 entrades, ua toponimia major d’enquia un milèr d’entrades e un vocabulari basic sus era nhèu. Toti aguesti trebalhs poderien èster prèsti enguan.

Per tant, 2018 e 2019 se previen coma dus ans enes que se demore fòrça actiuetat en çò que tanh ara produccion de libres per part dera Acadèmia.

Manu Moga