Enguan, coma tostemp, Musèus dera Val d’Aran organizèc un eveniment fòrça especiau entà celebrar eth Dia Internacionau dera Poesia, que volec centrar especiauments enes hemnes. Programèren ua serada organizada en torn as Muses dera Paraula dera mitologia, qu'inspirèren un recitau de poesia fòrça especiau.

Hemnes e òmes liegeren deuant eth public lèu 30 composicions en aranés, catalan e castelhan, mès tanben en basc e galhec.

Vèrsi centrats ena figura dera hemna, reivindicatius, comics e desgarradors per parts iguals.

Es bibliotèques de Vielha e Salardú, amassa damb Musèus dera Val d’Aran, escuelheren òbres de Montserrat Abelló, Amalia Domingo Soler, Esther Borrell, Tòni Escala, Santa Teresa de Jesús o Gloria Fuertes, entre d’auti entà inspirar aguest dia tan especiau.

Era Escòla de Musica dera Val d’Aran e era Escòla Tchaikovsky participèren tanben tocant e cantant entre poesia e poesia.

Es encargats de recitar aguesti poèmes heren arrir e plorar es espectadors, que gaudiren d’aguest acte que s’alonguèc enquias 12 dera net.

Un an mès, eth Musèu Etnologic de Vielha se tornèc a convertir ena sedença dera poesia en Aran, hènt gaudir as convidats d’ua serada magica e plia de cultura.