Aguest passat dissabte, 14 de junhsèga, auec lòc ua naua amassada en Conselh Generau d’Aran sus era gestion der os, ena quau sigueren presents eth conselhèr de Territòri e Mobilitat, Damià Calvet; eth director generau de Politiques Ambientaus, Ferran Miralles; eth director generau de Politiques de Montanha, Albert Alins,  era deputada deth Parlament de Catalonha e membre dera Comission de Miei ambient e Sostenibilitat, Anna Geli; eth sindic d’Aran, Carlos Barrera e es conselhèrs de Territòri, José Antonio Boya e d'Agricultura, Ramaderia e Miei Naturau, José Enrique Arró.
Ena amassada se desvolopèren es cinc punts aprovadi peth Plen deth Conselh Generau d’Aran deth passat 15 de junh e se dessenhèren es objectius deth protocòu d'accions de gestion der os en Pirenèu, entà implementar es objectius non sonque en cas d'ossi aversius, mès entà que tanben contemple era gestion globau ena zòna a compdar de 2019 un còp finalizat er actuau programa Piroslife.
Eth conselhèr de Territòri e Mobilitat garantic era contunhitat per part dera Generalitat de totes es mesures de supòrt ara ramaderia extensiva de nauta montanha qu'actuauments s'apliquen ena zòna Os.
Pendent era amassada tanben se prenec er acòrd de mantier era comunicacion e coordinacion entre eth Departament de Territòri e Sostenibilitat e eth Conselh Generau d’Aran, qu'a permetut préner era decision unanima de retirada deth territòri der os Goiat.
En aguest sens se trabalhe intensaments entà, un còp artenhut er acòrd, incorporar aguesta decision as administracions des Estats Francesi e Espanhòu, e as Comunitats Autonòmes d'Aragon e Navarra.

IMATGE: CONSELH GENERAU