Pendent eth dia d'aué, eth baile der Ajuntament de Bossòst, Amador Marqués, a mantengut ua amassada damb es representants dera Institucion de Ponent pera Conservacion e er Estudi der Entorn Naturau (IPCENA-Ecologistes), entre es quaus se trapaue eth secretari generau dera entitat, Joan Vàzquez. 

En aguesta amassada s'a analizat era repercussion ambientau, ecologica e economica dera propòsta de Foment entara milhora dera N-230 entre era boca nòrd deth tunèl de Vielha e eth pòble d'Aubèrt.

Segontes a declarat Marqués "er Ajuntament e IPCENA coincidim en que cau milhorar era carretèra entara seguretat des usatgèrs, mès era alternatiua preferida peth Ministèri atempte còntra es valors païsatgistic e era salut des abitants d'Aran, pr'amor que place Bossòst e es pòbles de Baish Aran en epicentre deth pas constant e en aument des camions". 

Ambdues entitats considèren qu'ei necessari revertir er hèt de qu'era N-230 s'age convertit en "principau corredor centrau de transit pesat, ua amenaça entara seguretat e era salut dera gent e era natura". 

IMATGE: AJUNTAMENT DE BOSSÒST