Tath torn des 5 dera tarde s’a produsit pròp dera rotonda d’entrada ath pòble de Bossòst un accident que, segontes eth Servici Catalan de Transit, a causat era mòrt d’ua hemna.

Er accident aurie estat causat per un chòc frontau entre un camion e eth torisme qu’anaue condusint era pròpia victima. Per ara non coneishem es motius pes quaus s’a produsit aguesta collision.

Era N-230 a quedat talhada entà poder retirar es veïculs dera carretèra, e es Mòssos an establit un pas alternatiu entara gent que baishaue direccion Bossòst.

Enquiath lòc der accident s’an desplaçat diuèrses dotacions de Pompièrs d’Aran e Mòssos d’Esquadra, atau coma es servicis d’emergéncies.

Justament hè uns mesi que se produsic, a pògui mètres deth lòc de collision, un aute accident mortau que, lementablament, costèc era vida d’ua vesia de Bossòst.

Peth moment, desconeishem mès detalhs d’aguest trist accident que dèishe aué ua naua victima mortau ena carretèra.