Repertòri de bones noticies ena darrèra amassada entre Torisme Val d’Aran e empresaris deth territòri, celebrada en Conselh Generau d’Aran. Aquiu  s’i an balhat interessantes donades qu’an metut de manifèst era milhora dera campanha toristica d’aguest darrèr ostiu respècte eth passat.

Destaque er increment deth 10% dera estada mieja des toristes pendent eth mes d’agost respècte eth madeish periòde der an passat. Tanplan, cau remercar era pujada de lèu eth 19% deth ADR en passat junh, qu’ei ua mètrica qu’indique eth promiei pagat per abitacion aucupada.

Eveniments esportius dera talha det Tour de França an contribuït a possar era marca Val d’Aran en mercat internacionau, mès tanpòc cau desbrembar-se dera amplia aufèrta culturau e naturau dera Val e des naues installacions, coma eth centre d’interpretacion dera Artiga de Lin.

Ara calerà demorar as donades dera campanha de tardor, tot e que semble indicar qu’ enguan non defraudaran, ja qu’estam viuent un des milhors ans entara recuelhuda de misharnons ena Val d’Aran.