Segontes eth registre voluntari dera Glèisa de Sant Fèlix, Bagergue arrecebec eth passat mes d'agost un 25'56% mès de visitants qu'eth madeish mes der an anterior. Ua donada que doble es visitants de 2015.

Mès de 6.200 persones visitèren aguesta reconeguda "Vila Florida 2017", damb 4 Flors d'Aunor, a on, pendent aguest ostiu, s'an distribuït  mès de 8.000 triptics toristics deth pòble, s'a creat, de forma conjunta damb Rialp, Vilaller, Canejan, era Seu d'Urgell, Arties era campanha "Viles florides deth Pirenèu de Lhèida" a trauès d'ua publicacion de 12.000 huelhetons repartidi pes oficines de torisme deth Pirenèu e se compde damb era "Ruta des espacis floridi", que permet conéisher es cornèrs mès especiaus deth pòble.

Mès enlà der atractiu de Bagergue coma Vila Florida, s'a potenciat tanben era zòna d'escalada damb era creacion de "Ròca Aran".

Ath delà, era aufèrta gastronomica ei dejà un reclam consolidat: eth pòble compde damb es Circuits d'Orientacion, era Hormatgeria Tarrau e eth Musèu Eth Corrau.

Eth Baile dera EMD, Marc Tarrau, s'a congratulat per aguest "tan significatiu augment des donades de visitants. Ues donades que s'expliquen pera apòsta decidida ena qualitat dera auferta toristica qu'aufrissen es establiments de Bagergue, era promocion continuada deth pòble damb era distincion de "Vila Florida 2017" e, per descomptat, per toti es atractius toristics qu'aufrís Bagergue atau coma peth simple hèt de poder passejar per un pòble florit, net e suenhat, ja qu'ei era imatge mès important qu'a d'aufrir non sonque Bagergue, senon tota era Val d'Aran coma modèu a seguir". 

IMATGES: EMD BAGERGUE