Dejà ei recuperat eth tram deth Camin de Soberado enquiath guardader der aigua

09/09/2017

Eth Conselh a realizat aguest ostiu era recuperacion deth tram deth Camin de Soberado enquiath guardader der aigua. Er emplaçament dera zòna a on s'a efectuat era accion ei rota entre Vielha e eth Pòrt dera Picada en tot passar peth Refugi dera Artiga de Lin.

Era enterpresa S.A.V.A. a estat era encargada d'amiar a tèrme aguesti trebalhs, qu'an compdat damb un pressupòst de 25.768 €, provenenti deth departament d’Empresa e Coneishement dera Generalitat e eth convèni de collaboracion entre eth Conselh Generau d’Aran e era Fundacion Endesa entara recuperacion de camins ena Val d’Aran maumetudi pes aiguats der an 2013.

Aguest ei er antic camin d'accès que portaue ara Artiga de Lin e qu’acumulaue ua grana quantitat de vegetacion que lo caperaue, pèires queigudes des murs e se trapaue fòrça erosionat pera aigua.

S'a bastit un accès ath camin des deth Parcatge dera Artiga de Lin, quate passarèles entà crotzar es barrancs d’Aubèrt e de Bernatet e dera hònt existenta, ath delà de reperfilar eth camin en tot netejar era zòna, e de bastir parabandes de seguretat ath long de tot eth camin e en guardader dera aigua.

Aguesta accion s'includís laguens des trabalhs realizadi enes darrèri mesi per part deth govèrn aranés entà milhorar er accès ara ribèra dera Artiga de Lin. Trebalhs entre es quaus s'includís eth tren dera Artiga, damb eth quau es visitants pòden accedir en tot caminar des deth madeish parcatge ath costat dera ermita enquias Uelhs deth Joeu e arribar enquiath madeish Pla dera Artiga.

Damb era melhora deth Camin de Soberado ath guardader dera aigua, es visitants dera ribèra dera Artiga de Lin pòden gaudir de tota era beresa d'aguest lòc e escuélher de quina manèra vòlen efectuar era visita, pr’amor que pòden accedir damb eth tren dera Artiga ara ora de pujar enquiath pla e baishar en tot caminar per aguest nau camin, o hè'c ara inversa.

IMATGE: CONSELH GENERAU D'ARAN
Clara Villar