Era estacion d'esquí aranesa a previst daurir, s'es condicions meteorologiques ac permeten, 137 km de pistes entath pònt de deseme, que comence deman. 

Dempús des 75 cm de nhèu que queigueren en Baqueira-Beret era passada dimenjada, es esquiadors poiràn gaudir, tostemp qu'eth temps ac permete, deth 90% de pistes dubèrtes, que somen 97. Dubèrti tanben ena sua totalitat es remontadors (35) e d'autes installacions. 

Baqueira lidere, dejà a dia d'aué, es listes d'estacions d'esquí espanhòles en tot èster era qu'a un major nombre de quilomètres, remontadors e pistes dubèrts. Tanben se consolide coma era estacion damb major acumulacion de nhèu.

Aguest serà un des pònts de deseme damb mès nhèu des darrèri ans, damb ua espessor de nhèu que supère eth mètre en còtes nautes e 65 cm enes baishes. 

42 pistes blus, 40 vermelhes, 17 neres e 6 verdes, damb ues condicions de nhèu povàs magnifiques.

Es airaus de debutants des tres zònes (Baqueira, Beret e Bonaigua) se traparàn en plen rendiment entà arrecéber as petits, e non tant petits, qu'agen eth desir d'iniciar-se enes espòrts blanqui.

Entà facilitar era crompa de forfaits, des d'aué se daurissen damb orari especiau enquias 22:00 ores es taquilhes de Ruda e 1500. Entà remassar eth forfait de tempsada era oficina de Baqueira 1500 tanben se traparà dubèrta enquias 22:00 ores. 

Se traparàn dubèrts e en foncionament era totalitat de servicis qu'aufrís era estacion: loguèr de materiau, restaurants, cafeteries, escòles mairaus e parcs infantils. 

IMATGE: BAQUEIRA-BERET