Vielha e Mijaran apròve ua modificacion pressupostària de lèu 800.000 èuros

27/05/2020

Er Ajuntament de Vielha e Mijaran a aprovat ua modificacion deth pressupòst de lèu 800.000 èuros en çò qu’a estat eth prumèr plen ordinari celebrat en estat d’alarma. En aguest sens, er acte s’a realizat de forma presenciau en tot mantier era distanciacion entre membres. 

Era partida mès importanta, era de 400.000 èuros, ei era destinada a atier emergéncies de caractèr sociau e economic qu’a deishat era pandèmia dera Covid-19 en municipi.

Aguesta aprovacion dera modificacion de crèdit, totun, non a compdat damb eth supòrt dera oposicion. 

Criticada a estat tanben era pujada deth 2% deth sòu des foncionaris der Ajuntament de Vielha e Mijaran qu’era lei prevé. 

Ath delà, s’a aprovat ua partida de 141.000 èuros entà trabalhs de mantenença deth depòsit d’aigua de Vielha. 

Laura Rodríguez