Multitudinària Corsa dera Hemna: era Val d'Aran lhèue era votz eth 8 de març

08/03/2020

I an corses en qu’er objectiu ei arribar a mèta en tot hèr eth milhor temps possible. E i a d’autes corses en que çò qu’impòrte ei participar. Aguest darrèr a sigut eth cas dera Corsa dera Hemna de Vielha, qu’enguan a artenhut era setau edicion e 420 inscripcions.

Ua corsa de 5 quilomètres pes carrèrs deth cap-lòc aranés que vò reivindicar era figura dera hemna, en tot demanar ua igualtat reau entre hemnes e òmes en plen sègle XXI.

Tot e qu’era participacion des hemnes siguec superior, eri tanpòc voleren perder-se aguesta oportunitat entà reivindicar es drets dera hemna en sòn dia internacionau

Ena categoria des hemnes, Vega Carrera, Ada Méndez e Beatriz Brenes se heren damb er aur, er argent e eth bronze respectivament. Per aute costat, Jose Ramón Rodríguez guanhèc era absoluta ena categoria des òmes, seguit per Xavi Gutiérrez e Yago Rodríguez. 

Laura Rodríguez