Mòstra d'oficis tradicionaus "Mèstres, artesans o artistes?"

13/04/2019

Eth pròplèu diuendres, 19 d'abriu, era glèisa de Sant Joan d'Arties acuelh era mòstra d'oficis tradicionaus "Mèstres, artesans o artistes?".

Damb aguest eveniment, Musèus Val d’Aran vò dar a conéisher es tecniques de trebalh, materiaus o airines entath bastiment e ornamentacion des nòstes glèises. Era glèisa de Sant Joan d'Arties e era exposicion "Aran me fecit" son er encastre a on se desvoloparà aguesta mòstra.

Es artesans que heren possible eth bastiment d'aguestes glèises, mos an legat era sua òbra e era sua faiçon de trebalhar… a dia de aué, un art. Gràcies ad aguesta consideracion ei possible conservar e gaudir d'aguestes òbres.

En aguesta mòstra i seràn present era escultora Glòria Coronas, eth restaurador Antoni Fernández, era conservadora-restauradora Cristina Thió, es forjadors Germán Martínez e Sergi Clos, era ceramista Carme Vicens e era restauradora de teishuts Montserrat Xirau. Aguesti professionaus mos aproparàn ath trebalh d'aqueri artesans o artistes deth passat, mentre mos mòstren era sua faiçon d’hèr e enténer eth sòn ofici.

Hònt: MUSÈUS VAL D'ARAN
Clara Villar