Eth Palai de Gèu de Vielha renauís es biciclètes de spinning entàs activitats dirigides

26/09/2019

Es usatgèrs deth Palai de Gèu de Vielha compden des d'aguesta tardor damb es naues biciclètes de spinning entàs activitats dirigides ena installacion municipau, en tot èster substituïdes pes anteriores biciclètes que ja auien fòrça ans.

Aguesta accion qu'a amiat a tèrme er Ajuntament de Vielha e Mijaran, ère includida ena dusau modificacion de credit deth pressupòst municipau aprovada aguesta passada primauera, en tot supausar ua melhora important en aguest servici, pr'amor qu'es anteriores biciclètes dejà s'auien quedat obsoletes.

“Aguesta intervencion mos permet contunhar en tot melhorar era qualitat des servicis que des der Ajuntament aufrim as usatgèrs deth Palai de Gèu enes desparières sales a on se realizen activitats dirigides”, afirme eth dusau tinent d'alcalde, Alberto López.

A compdar d'aguest dimèrcles, es classes dirigides de spinning tornen a èster en foncionament, dempús dera pana ena canerada generau d'aigua patida dimenge.

“Era màger part des servicis e classes dirigides abituaus ja se tornen a hèr damb normalitat sonque un dia e miei dempús dera pana, gràcies ara collaboracion deth Conselh Generau d'Aran damb er Ajuntament, es trabalhadors deth Palai de Gèu, es servicis de neteja e antics trabalhadors dera installacion”, precise López.

HÒNT: AJUNTAMENT DE VIELHA E MIJARAN

Laura Rodríguez