Era Val d’Aran s’a desvelhat aguest maitin deth 30 de març tota caperada de nhèu. De hèt aguesta a estat era nheuada mès abondiua dera sason, damb celhs qu’an anat des 5 as 10 centimetres en Baish Aran e de 15 a 20 centimètres en còtes mès nautes.

Ua nheuada, totun, que Baqueira/Beret e toti es amants dera nhèu non poiràn gaudir, pr’amor, arrebrembam, qu’era estacion aranesa se vedec obligada a barrar es sues installacions. Ac hèc eth passat dissabte 14 de març, en tot finalizar atau era tempsada, coma mesura de prevencion dauant eth coronavirus.

Damb ues condicions normaus, aguesta Setmana Santa s’auesse encarat damb ues excellentes expectatives, gràcies ad aguesta nheuada e es generosi celhs qu’a deishat, quauquarren que se lamente en Baqueira e en enes sectors d’ostalaria e restauracion.

Aguesta baishada generalizada des temperatures a hèt qu’en pòbles coma Bossòst eth termomètre mèrque aué ua maxima de 5 grads.

Condicions climatologiques que hèn un shinhau mès facil eth confinament en casa de toti, maugrat que bèri uns camparàn damb nostalgia moments erosi damb era nhèu, coma eth bastiments d’un pipòt de nhèu.

De cara a deman se demore un leugèr ascens des temperatures ena Val d’Aran, e en principi non se prevén precipitacions.