Era Val d’Aran se premanís entà arrecéber ua intensa dimenjada d’eveniments autant culturaus coma esportius. 

En prumèr lòc, pendent eth dissabte 7 de març, Canejan celebrarà ua naua edicion dera hèsta des Barbacans entàs 19.30 ores. 

Ua tradicion fòrça antiga, que dempús d’auer-se perdut, Canejan recuperèc en an 2004.

Es vesins deth pòble se disfrassaràn damb pèths, còrnes e esquères, en çò que supause era fin des hèstes de Magràs. Atau, era gent recorrerà es carrèrs deth pòble damb halhes entà espantar es dolenti esperits. En acabar, er Ajuntament de Canejan aufrirà un aperitiu entà toti es assistents.

Per ua auta banda, aguesta dimenjada tanben ven mercada pera Corsa dera Hemna deth dimenge 8 de març. 

Aguesta corsa reivindicatiua dera figura dera hemna, ei de 5 quilomètres e trauessarà Vielha. Se poderà hèr en tot córrer o caminar. Era gessuda serà tàs 11 deth maitin des dera Plaça d’Aran.

Es inscripcions se pòden realizar online e tanben de forma presenciau aué, diuendres 6 de març, e deman, dissabte 7 de març de 17 a 20 ores ena Plaça deth Conselh Generau d’Aran.