Un vesin de Bossòst detengut en ua operacion còntra eth trafic de drògues

04/04/2019

Agents des Mòssos d'Esquadra detengueren eth passat dimars a un òme de 46 ans, vesin de Bossòst e de nacionalitat espanhòla, coma presomptiu autor d'un delicte còntra era salut publica.

Des de finaus der an passat, es Mòssos dejà auien coneishença dera possible existéncia d’un trafegaire de dròga pera zòna deth Baish Aran que provedie substàncies estupefasentes a consumidors dera comarca e francesi.

Gràcies ad aguesta informacion, se dauric ua investigacion que permetec identificar era identitat deth supausat trafegaire. Es agents verifiquèren que periodicaments realizaue viatges dehòra de comarca e, tot apuntaue, que les profitaue entà provedir-se de drògues que dempús distribuïe pera Val d'Aran.

Eth passat dimars se montèc un dispositiu policiau que permetec localizar e arturar eth veïcul deth sospitós quan tornaue ath nòste territòri.

Es agents enregistrèren eth coche e localizèren un compartiment dissimulat ena zòna deth portaequipatges a on amagaue 18 grams d’eroïna, distribuïdi en cinc paquets. Per aguest motiu siguec detengut coma presomptiu autor d'un delicte contra era salut publica.

Eth madeish dia s'enregistrèc era viuenda deth detengut, en carrèr Sant Antoni de Bossòst. Aquiu laguens se localizèc ua bossa damb 90 grams de cocaïna, 3 bossetes damb marihuana, dues balances de precision, e diuèrsi esturments pròpris d'aguesta activitat illicita.

Eth detengut, damb antecedents, passèc aguest dimèrcles peth jutjat d'instruccion en foncions de guardia de Vielha, a on era autoritat judiciau decretèc er ingrès en preson.

HÒNT: MOSSOS D'ESQUADRA
Clara Villar