Ua cinquantia de persones s’an concentrat ena plaça dera Glèisa de Vielha coma mòstra de supòrt as politics catalans que son jutjadi. Aguesta amassada a cobrat cèrta importància, pr’amor que s’ha hèt a coincidir damb er inici deth jutjament as liders politics catalans empresoadi.

Era concentracion comencèc en tot dar era bona net as 12 presoèrs politics. A continuacion se liegec un manifèst en favor as drets fonamentaus, coma son era libertat d’expression des persones.

Entà acabar, se cantèren cançons coma er imne dera Val d’Aran, "Montanhes Araneses", e “Es Segadors”.

Era concentracion siguec organizada per Taula per Aran, qu’ei un corròp de ciutadans damb diuèrses idèes politiques, transversau e dubèrt ara participacion. Es accions en favor dera libertat e es auti drets fonamentaus des persones, seguiràn en tot organizar-se.

Aué arranque era dusaua session deth judici, a on es acusacions arresponeràn as allegacions realizades pes defenses des caps politics de Catalonha encausadi. Un judici que dejà a traspassat es termières der Estat Espanhòu e que se trape ena guardada internacionau.