Suspenuda era Crema der Haro de Les

12/06/2020

Ère un secrèt a votzes mès enquia ara non s’a hèt oficiau: era Crèma der Haro de Les dera net de Sant Joan a estat suspenuda per arrasons de fòrça major en aguest contèxte de crisi sanitària en que mos trapam.  

Eth Plen der Ajuntament de Les s’a vist obligat a préner aguesta decision pr’amor que non se pòt garantir era distanciacion de seguretat entre es visitants. Ua decision ena quau tanben i an participat es associacions e agents encargadi dera organizacion d’aguestes Hèstes deth Huec. 

Mès çò de primordiau, coma dejà a manifestat eth consistòri, ei era salut de toti e tanben era lèu reactivacion economica entath municipi, que se produsirie un viatge redubèrtes es termières. 

Tot e qu’aguesta net de Sant Joan non se poirà celebrar, er Ajuntament trabalhe entà acabar d’elaborar una sèrie d’activitats alternatiues entà hestejar de bèra forma aguestes Hèstes deth Huec de Les. 

De moment, er Haro d’est an passat demorarà ena plaça un an mès. 

Laura Rodríguez