Dejà hè un mes que s’an iniciat es òbres dera residéncia geriatrica de Sant Joan de Les, que compden damb un pressupòst que vire en torn des 2 milions e miei d’èuros. Ues òbres que non se trapen bric aluenhades dera polemica pera manca de consens formau entre eth Conselh Generau d’Aran e era Generalitat de Catalonha en çò que tanh ara concertacion des places.

Segontes eth projècte, er equipament compdarie damb 30 places publiques e d'autes 30 concertades en regim intèrne, e damb 20 places de centre de dia, des que 10 ne serien publiques es autes 10 privades.

Ath delà, era residéncia geriatrica de Les compdarà damb un plan integrau d'atencion domiciliària inedit en Catalonha entà aufrir un nau servici entada aquera gent grana qu’ac age de besonh.

S’a previst qu’entath 2019 ja se pogue inaugurar aguesta naua residéncia tant demanada pes aranesi que de ben segur ajudarà a redusir era lista de demora existenta enes residéncies dera Val d’Aran.