Dempús des contunhades nheuades que i a agut ena Val d’Aran pendent aguest mes de hereuèr, non sonque s’a vist afectada era mobilitat enes carretères, senon que tanben comence a generar un risc anaut de lauegi en bona part deth territòri. Segontes eth darrèr bulletin deth Centre de Prediccion de Lauegi emetut aguesta setmana, eth risc pendent es pròplèus dies ei de nivèu 4 sus 5, ei a dider, nivèu fòrt. Açò poderie generar lauegi enes montanhes, e per aquerò se demane extremar es precaucions s’era gent vò desvolopar actiuetats enes còtes anautes.

Pendent era passada setmana, eth Conselh Generau d’Aran provoquèc lauegi en parçan dera Bonaigua tà minimizar es risqui. Ath delà, pendent era dimenjada ja se podec veir beth lauet, ena estacion de Baqueira-Beret, en parçan d’Argulls. Per tant, cau tier en compde eth naut risc de patir bèth lauet enes montanhes pendent es pròplèus dies.