Prumèra Caminata Canina organizada pera associacion 4Pautes

11/06/2017

Era associacion peth benèster animau 4Pautes, en collaboracion damb er Ajuntament de Les, a organizat era prumèra Caminata Canina dera Val d'Aran. Aguest eveniment aurà lòc eth pròplèu dimenge, 25 de junh, tàs 20:00 ores en Les.

Aguesta Caminata ei compausada per un recorregut de 2km que comence ena plaça der Haro e acabe tot just en Ajuntament, ua ruta apta entà toti es publics pensada entà passar un bon moment en familha damb es peluts dera casa. Era inscripcion ei totauments gratuïta.

Sonque poiràn participar animaus que vagen corrèctaments estacadi e acompanhats d'un propietari responsable. Des dera associacion tanben demanen rebrembar portar aigua entàs mascòtes e bossetes entà mantier net er entorn.

Pendent aguest eveniment se meterà a disposicion deth public un stand damb informacion sus era associacion, se poiràn hèr donatius e i auran diuèrsi articles ara venda, coma era samarreta tecnica "Amor ei ua paraula de 4Pautes". 

En finalizar era ruta i aurà un pica pica entàs gossets e es sòns acompanhants! Atau coma tanben un sorteig damb diuèrsi productes cortesia des establiments patrocinadors.
Clara Villar