Eth Conselh Generau d’Aran a aquerit ua naua ambulància entath Servici Integrau de Pompièrs e Emergéncies d’Aran.

Aguest veïcul incorpòre un nau sistèma de transpòrt sanitari entà pacients qu'an de desplaçar-se enquia centres assistenciaus dehòra dera Val d'Aran entà realizar-se pròves diagnostiques complementàries o quauque tipe de tractament.

Eth transpòrt dispòse d'un sistèma de cagira pionèr en Espanha que permet desplaçar as pacients des deth punt de recuelhuda enquiara zòna der espitau a on s'age de realizar eth tractament sense besonh de cambiar de cagira. Se tracte d'ua cagira ergonomica e comòda que dejà utilizen es ambulàncies en Alemanha e Àustria, e qu'ei era prumèra d'aguestes caracteristiques en Espanha.

Eth Conselh Generau d’Aran a destinat 134.000 euròs ar aquesiment dera naua ambulància en tot pensar sustot ena comoditat des pacients ara ora de hèr longui desplaçaments des dera Val d'Aran as centres assistenciaus de Lhèida, Barcelona o França.

Se tracte d'un Volkswagen Transporter damb traccion integrau e cambiament automatic destinat a corbir prètzhèts d'ambulància non assistenciau de classa A2.

Er aquesiment dera ambulància ven motivat pera caducitat d’ua auta mès anciana pr’amor qu'era vida utila d'aguest tipe de veïculs ei de 10 ans.

Eth nau veïcul entrarà en servici es pròplèus dies.

Hònt: CONSELH GENERAU D'ARAN