Era jornada electorau ena Val d’Aran a començat damb totau normalitat damb toti es collègis dubèrts ja tàs 9 deth maitin. Es coes que s’an pogut guardar en bèri des collègis electoraus aranesi poirien pronosticar boni resultats de participacion. Tot e que calerà demorar enquiath ser entà confirm’ac de forma oficiau.

Un totau de 9 municipis aranesi cerquen ua naua composicion enes plens des sòns Ajuntaments.

En çò que tanh ar Ajuntament de Vielha e Mijaran, un totau de 13 còssos seràn escuelhudi aué en ues eleccions en que i concorren enquia 7 formacions politiques.

Aué tanben se conformarà un nau plen en Conselh Generau d'Aran, a on mès de 7.100 aranesi son cridadi as urnes entà escuélher 13 conselhèrs.

Arrebrembam que se poderà votar enquias 8 deth ser, ora en qu’es collègis electoraus barraràn e se començarà eth recompde de vòts. Era urna des vòts des eleccions europèes serà era prumèra en recompde, seguida dera urna des eleccions municipaus e acabant pera des vòts as conselhèrs deth Govèrn d’Aran.