Eth Conselh Generau d’Aran e era Fondacion Endesa dejà an celebrat era inauguracion dera reabilitacion deth tram deth Camin Reiau enes tèrmes de Vilamòs e Es Bòrdes, ua des zònes que mès afectades quedèren dempús des aiguats de 2013.

Rebrembam qu’eth tram deth Camin Reiau que se inauguraue aué e que se place ara nautada d’Era Bordeta (laguens deth tèrme municipau de Vilamòs) quedèc totaument destrossat en 2013, enquiath punt que calec condicionar un camin alternatiu, que passaue entre finques particolares entà poder comunicar diuèrsi bastiments e parcelles.

Era òbra a consistit en totau rebastiment deth camin, que s’a artenhut damb era creacion d’un terraplen e eth bastiment d’un mur esculhèra damb talhús, que protegirà aguest camin de possibles futurs aiguats.

Aguest projècte a estat possible gràcies as negociacions deth Conselh damb era Fondacion Endesa, qu’accedic ara inversion de 400.000 euròs, quantitat que se some as auti 400.000 que dejà aportèren en 2014 e que se destinèren a diferents trabalhs de recuperacion e apariament des maus ocasionadi per aguestes inondacions.

Ath delà, des der an 2000 Endesa a collaborat ena Val d’Aran damb projèctes d’illuminacion de diuèrses glèises deth territòri, damb ua inversion totau de 150.000 euròs.

IMATGES: CONSELH GENERAU D'ARAN