Les dejà a inaugurat era sua naua passarèla, un element emblematic deth pòble que quedèc fòrça maumetut damb es riades der an 2013.

Dempús de cinc ans sonque manque acabar de condicionar era part antiga deth pònt e armonizar es accèssi entà recuperar era normalitat en aguesta infraestructura.

Er Ajuntament municipau a compdat damb era totau collaboracion dera Deputacion de Lhèida entà amiar a tèrme aguesta recuperacion, mès non a compdat damb era ajuda de cap auta institucion.

Era Deputacion s’a hèt cargue des dues tresaus parts des 250.000 euròs d’inversion d’aguestes òbres.

Era recuperacion d’aguest espaci servirà coma referéncia entà marcar era tendéncia dera regeneracion urbana.

Se ben eth bastiment dera naua passarèla ei un gran auanç entà sajar de barrar eth capitol des aiguats de 2013, ei cèrt qu’encara s’an de realizar trebalhs de manteniment en hilats de servicis que quedèren maumetuts damb era creishuda deth Garona.

En tot cas, aguesta infraestructura mantierà eth rebrembe d’un des moments mès tragics dera istòria deth pòble, mès tanben d’un des mès solidaris e polits, a on es vesins de Les trebalhèren amassa pendent dies entà sajar de recuperar un minim dera normalitat qu’er arriu s’emportèc.