Era Val d’Aran dejà a barrat damb fòrça èxit era 19 edicion deth cicle Romanic Musicau, un festivau que barrege eth patrimòni romanic des glèises araneses amassa damb era musica classica.

Enguan, aguest cicle comencèc eth dia 4 d’agost ena Glèisa dera Purificacion de Bossòst e a agut lòc cada diuendres deth mes enes glèises d’Arties e Tredòs, entà finalizar en Sant Miquèu de Vielha, damb eth quartet valencian Concertare.

En aguest darrèr concèrt, coma nauetat, eth grop hèc a servir er organ de tuèus dera glèisa, quauquarren qu’enquiara non s’auie hèt en aguesti espectacles.

Des dera organizacion dejà se trapen pensant enes pròplèus edicions deth Romanic Musicau, un acte damb fòrça renòm en territòri e que cada còp acuelh mès visitants.

Aguesti cicles tostemp comencen prumèr damb ua brèu explicacion dera istòria e arquitectura des glèises entà contunhar dempús damb eth concèrt, d’aguesta manèra apròpen a locaus e visitants non sonque era part culturau dera musica, senon tanben eth patrimòni romanic aranés.

Ua naua edicion que se barre dempús d’auer estat gaudida per centenats de persones, e des dera sua organizacion dejà an ena ment era celebracion deth 20 aniversari d’aguest acte culturau que cerque dar a conéisher es magnifiques glèises romaniques d’Aran.