Deth 10 ath 12 d’abriu era Val d’Aran torne a acuelher ua naua edicion deth Màster d’Atencion Pre espitalària e Espitalària Urgenta MAPHU: Mòdul d’Atencion damb Multiples Victimes (AMV) e Atencion en  Montanha.

Er objectiu d’aguesta formacion ei coordinar eth trabalh deth personau sanitari damb eth personau d’emergéncies, entà méter en situacion es accions d’uns e d'auti.

Es estudiants deth Màster artenhen coneishements sus materiau de montanha, maniòbres de seguretat damb elicoptèr, foncionament e estructura deth Grop de Rescat de Montanha, coneishements deth materiau de rescat d’iuèrn, rescat en lauegi, tractament en ipotermia, reanimacion de victimes enterrades e sessions d’abilitats ena atencion a multiples victimes, entre d’auti.

Aguesta ei ua formacion plan importanta e que compde damb ua valoracion fòrça positiua en tota Catalonha, ja que mès deth 60% deth personau d’infermieria deth Sistèma d’Emergéncies Medicaus dera Generalitat de Catalonha (SEM) an passat peth Mastèr d’Atencion Pre-espitalària e Espitalària Urgenta pendent toti aguesti ans.

Es activitats se desvoloparàn en sessions de maitin e vrespada en disparièrs lòcs dera Val d’Aran.

Aguest Màster ei organizat peth Conselh Generau d’Aran amassa damb era Universitat de Barcelona, Pompièrs e Emergéncies d’Aran e er Institut de Formacion Contunha de Catalonha.

Es activitats que se desvolopen compden damb era collaboracion deth Servici Aranés de Benéster e Salut (SABS) e dera enterpresa Habock Aviation Group.

Eth MAPHU ei dirigit per Javier Colina, professor titular d’Infirmeria dera UB, e Fran Cardeñes, director tecnic de Pompièrs e Emergéncies d’Aran, e coordinat per Juanmi Riu, Àlex Orna, Xavier Bernárdez e Fran Tébar.

Hònt: CONSELH GENERAU D'ARAN