Eth Conselh realizarà ua restauracion des pentures dera Glèisa de Sant Ròc de Begòs

25/08/2017

Eth Conselh Generau d'Aran a previst realizar ua restauracion des pentures muraus dera zòna deth presbitèri ena glèisa Sant Ròc de Begós. Es trebalhs començaràn a compdar de deluns, 28 d'agost, e s'alongaràn pendent tot eth mes de seteme.

Rebrembam qu'aguestes pentures sigueren descobèrtes pes tecnics deth Centre de Restauracion de Bens Mòbles de Catalonha en an 2009 mentre realizauen enes murs dera glèisa diuèrses cales de prospeccion. Dessús der arc deth presbitèri, a un e aute costat, se i localizèc ua representacion de Crist Crucificat tamb sant Joan e era Mair de Diu, ath pè dera crotz. Ua pentura datada en 1618.  
 
Ena vòuta deth presbitèri tanben se localizèren pentures.En costat sud, se i pòden observar desparièrs personatges e decoracions vegetaus que semblen correspóner a diuèrses fases pictoriques superpausades. En costat nòrd, tanben i a rèstes de pintures maugrat qu’en estat actuau, resulten plan dificiles d’interpretar.   

Aguestes pintures que se trapen, actuauments, encara parciaument cobèrtes per ua capa de pintura deth sègle XX e presenten fòrça mau estat de conservacion, damb fisures, pèrtes e  lheuaments. 

Era actuacion, a cargue dera empresa especializada TdArt, ath delà dera descubèrta, restauracion  e conservacion des pentures prevé tanben afavorir-ne era lectura e comprension. Ei previst efectuar cales ena rèsta de parets interiors dera glèisa entà comprovar era existéncia de mès pintures muraus, atau coma analizar er estat de conservacion des tres retaules barròcs deth sègle XVIII qu'a era glèisa. 

Aguesta intervencion, ara que se i destinarà un pressupòst totau de 31.450,77€, a estat possible gràcies ara subvencion que arrecep annauments eth Conselh Generau d’Aran dera Deputacion de Lhèida entara conservacion e restauracion deth patrimòni aranés. Era Generalitat de Catalunya tanben a participat ena restauracion damb ua subvencion concedida a trauès deth Centre de Restauracion de Bens Mòbles de Catalonha.

IMATGES: CONSELH GENERAU D'ARAN
Clara Villar