Eth Conselh licite es òbres deth 2au quirofan der Espitau Val d'Aran

22/02/2018

Era prumèra convocatòria quedèc desèrta e se demore qu'en pòqui dies siguen adjudicadi es trebalhs

Eth Conselh Generau d’Aran torne a licitar es òbres de bastiment deth 2au quirofan der Espitau Val d’Aran de Vielha, dempús de que s’age quedat desèrta era prumèra convocatòria pendent aguest mes de hereuèr. Segontes a comentat eth sindic d’Aran, Carlos Barrera, er escàs marge de temps dera convocatòria pòt auer empedit que i age agut aufèrtes economiques per part des empreses interessades. Cau rebrembar qu’aguestes òbres gessien per valor de 780.000€.  Es òbres consistissen non sonque en bastiment deth dusau quirofan, senon ena remodelacion deth que i a en foncionament aué dia.

Pendent era Comission Bilaterau deth passat mes de junh, s’acordèc era transferéncia de 500.000€ entara melhora der Espitau, en tot somar-se as 800.000€ que ja dispausaue eth Conselh. Ara, se demore que pendent aguesta primauera poguen començar es òbres en Espitau entà auer prèst çò de mès lèu possible aguesta infraestructura.

Er airau d’analitiques se transportarà ar espaci qu'aucupauen enquiara es servicis administratius e de direccion der espitau e que totes es accions que demoren entà melhorar er equipament seràn coordinades entà qu'agen era minima afectacion entàs usatgèrs.

Manu Moga