Eth Conselh Generau d’Aran acuelh eth Conselh Plenari dera Comunautat de Trabalh des Pirenèus

28/10/2020

Eth Conselh Generau d’Aran a estat aué era sedença deth 38au conselh plenari dera Comunautat de Trabalh des Pirenèus (CTP), en quau s’an tractat ahèrs primordiaus entath desvolopament des Pirenèus, en tot auer en compde es rèptes actuaus as qu’an de hèr front es territòris de montanha.                        

Era CTP ei un consòrci interregionau de cooperacion transfronterèra format pes govèrns d’Aran, Catalunya, País Basc, Navarra, Aragon, Principat d’Andòrra e es regions franceses de Naua Aquitània e Occitània.

Eth sindic d’Aran, Francés Boya, a participat en aguesta session plenària, qu’a estat presidida peth conselhèr d’Accion Exteriora, Relacions Institucionaus e Transparència dera Generalitat, Bernat Solé, e ena qu’an estat presents tanben telematica e presenciaument era delegada territoriau deth Govèrn dera Generalitat en Naut Pirenèu e Aran, Rosa Amorós, eth secretari d’Estat d’Ahèrs Europèus deth Govèrn d’Andorra, Landry Riba, e era comissària europèa de Coesion e Reformes, Elisa Ferreira, entre d’auti. Tanben a participat er alcalde de Vielha e Mijaran, Juan Antonio Serrano.

En aguesta jornada s’a valorat er impacte dera COVID-19 enes territòris fronterèrs de montanha e es rèptes socioeconomics e ambientaus dera pandemia, tanben s’an presentat es informes dera direccion dera CTP e eth fòrum transpirenenc dera Joenessa e s’a signat era declaracion des presidents e presidentes.

“Era Val d’Aran ei un territòri qu’a viscut tostemp entre es realitats diferents dera frontèra entre Espanha e França", a afirmat eth sindic d’Aran, en tot híger que: “se i a un moment en quau era idèa de cooperacion entre es territòris de montanha que conformen eth Pirenèu e que promò era CTP ei important, ei ara mès que jamès”.

HÒNT: CONSELH GENERAU D'ARAN

Laura Rodríguez